На 5 јуни 2020 година на крајот од свеченото литургиско славење во 10.30 часот во Скопската катедрала монс. Киро Стојанов ја откри и благослови спомен плочата во сеќавање на посетата на Папата Фрањо на Македонија и неговата молитва во катедралата, пред една година, во мај 2019 год. Спомен плочата е направена од мермер и останува траен знак на историската посета , како и повик и обврска да го сведочиме повикот на Папата: Бидете светлина на мирот!

Воедно ова Евхаристиско славење беше и проштално за досегашниот скопски декан и парох, дон Давор Топиќ. Пред седум години, во август 2013 год. симболично на роденденот на света Мајка Тереза дон Давор пристигна во служба како парох во катедралата „Пресвето Срце Исусово“ – Скопје. Бискупот Стојанов се присети на многу настани кои имаа свој врв со незаборавната посета на Светиот Отец во овие изминати 7 години и се заблагодари за неговото несебично градење и дарување во оваа локална црква. Благодарност до парохот упатија и парохиските претставници, а и самиот парох упати благодарност на Бога за искуството во оваа локална црква, на бискупот за татковската љубов и близина и на сите парохјани за заедничкиот пат низ ова време. Ги повика сите со иста отвореност да го дочекаат и примат новиот парох.

Во вечерните часови истиот ден, парохот дон. Давор преку видео конференција се сретна со парохјаните. Во семеен и чувствителен дух си разменија сеќавања и искуства на прекрасниот мозаик на заедништво кое се ткаеше од ден во ден, во радосни и болни моменти. ,,Сите наши односи, сето она што е убаво, ако сме со Христос, ако сме во Бога, остануваат и нека Бог го благослови ова наше големо семејство кое се вика Црква”, со овие зборови дон. Давор се прости од своите парохјани од кои многу не можеа да ги сокријат солзите. Ви благодариме дон Даворе!

Во катедралата „Пресвето Срце Исусово“ во Скопје на 5 јули 2020 год., pосле неделната света Литургија, скопскиот бискуп и струмичко-скопски епарх монс. Киро Стојанов ја откри и благослови спомен плочата во знак на 29. Апостолско патување на Неговата Светост папата Фрањо на 7 мај 2019 година во Македонија.

Бискупот Стојанов кажа дека оваа плоча ќе биде знак и ќе упатува во историскиот настан на Апостолската посета која ја живееше оваа црква и целата држава Македонија.

На плочата е насликано логото на Апостолската посета, а текстот е напишан на македонски и англиски јазик.

„НЕ БОЈ СЕ, МАЛО СТАДО“

Лука 12,32

НЕГОВАТА СВЕТОСТ

ПАПАТА ФРАНЦИСК

ЗА ВРЕМЕ НА СВОЕТО XXIX АПОСТОЛСКО ПАТУВАЊЕ НА

Р. МАКЕДОНИЈА НА 7 МАЈ 2019 ГОДИНА

ЈА ПОСЕТИ ОВАА СКОПСКА КАТЕДРАЛА И СЕ СРЕТНА СО

СВЕШТЕНИЦИТЕ, НИВНИТЕ СЕМЕЈСТВА И БОГОПОСВЕТЕНИТЕ

ОВАА ПЛОЧА ВО ЗНАК НА БЛАГОДАРНОСТ НА ТРОЕДИНИОТ БОГ ЗАЕДНО СО БОГОПОСВЕТЕНИТЕ ЛИЦА И ВЕРНИЦИТЕ НА ЦРКВАТА ВО МАКЕДОНИЈА ЈА ПОСТАВУВА

МОНС. Д-Р КИРО СТОЈАНОВ, БИСКУП

„БИДЕТЕ СВЕТИЛНИК НА МИРОТ“

ПАПА ФРАНЦИСК

Исто така, пригодна плоча е поставена и во бискупската резиденција во Скопје.

На 19 јуни 2020, на празникот „Пресвето Срце Исусово“ заштитник на Скопската бискупија и Kатедралната парохија во Скопје свечената евхаристиска прослава ја предводеше Скопскиот бискуп и епарх Струмичко – скопски,  монс. д-р Киро Стојанов.

Исто така за време на светата миса бискупот Стојанов го благослови елејот које се користи за елеопомазание на болните како и миро које се користи за крштење, миропомазание, свештеничко ракопологање и за осветување на нови цркви. 

Во својата хомилија бискупот рече: „Драги браќа и сестри, Побожноста кон Пресветото Срце Исусово за нас овде присутни и за голем број верници е една многу убава, корисна и спасоносна побожност. Празнувањето на оваа Таинството – Срце Исусово не води до самиот центар на економијата на спасението и до најдлабоката и најинтимна средба со Бога. Денес со вас би сакал најмногу да размислувам за тоа што апостол Иван пишува во своето прво послание, а кое пред малку го слушнавме. Во целото св. Писмо на Стариот и Новиот завет има само две места каде се прави обид да се изрази со човечки зборови Божјата бит.„

„Првото читање од книгата на Второзаконие или петта книга Мојсеева не потсетува на Божјата верност што се грижи за својот народ, го води, помага и брани, одржува Сојуз со Него само затоа што е верен на себе. Голема вистина за нас над која треба да се замислиме: ние во својата мала слобода можеме да бидеме неверни на Бога, можеме за жал да го напуштиме Бога, но Тој нас не може бидејќи не може да се одрече од својата Божествена верност – Тој останува верен. На тоа сознание далеку подлабоко ја темели св. Иван својата порака во оваа послание. Најнапред тој верноста на Божјата љубов ја гледа во тоа што Бог, тоа што не сме го заслужиле, ни го испрати својот Единороден Син и заклучува да во тоа е љубов, не дека ние сме го љубеле Бога туку дека Тој не љубеше нас и го испрати својот Син како помирител на нашите гревови. Значи, пред да ние воопшто можевме Бога да го љубиме Тој не љубеше нас. Од тоа следи дека Бог не може да има во себе никаква друга причина за повикување на човекот во живот освен причината која е во Него, а тоа е љубовта. Тој создавајќи ја „разлева“ својата љубов на сите созданија. Единствено ангелот и човекот се на кои така им се објавува да со нив може да воспостави дијалог на љубовта. Ние љубејќи го Бога на Неговата љубов не можеме ништо да додадеме. Но, знаејќи дека сме љубени можеме со изворот на љубовта љубејќи да воспоставиме дијалог Созданијата со Создателот и во тој дијалог да бидеме радосни, благодарни, восхитени бидејќи сме деца на љубениот – Љубовта„. 

„Според оваа Иван не води на темелот на христијанството доколку христијанството е нов Божји народ и доколку Црквата е таа заедница која Исус ја основа. До спознанието на Божјата љубов или Бога како љубов не можеме на друг начин да дојдеме туку со дар и тоа со дарот на Светиот Дух. Патот на нашето оправдување дека сме сфатиле или барем прифатиле дека сме деца на Божјата љубов можеме само преку човекот. Затоа централна тема на оваа послание е братската љубов. Дословно Иван вели: „да се љубиме еден со друг, зашто љубовта е од Бога, и секој, кој љуби, е роден од Бога и Го познава Бога; кој не љуби, тој не Го познал Бога, зашто Бог е љубов“ (1 Ив 4,7-8). Во Божјото дарување на Синот за наше помирување Бог постави темел на човекот за човекот. Иван вели: „кога така нè возљуби Бог, тогаш и ние сме должни да се љубиме еден со друг. Ако се љубиме еден со друг, Бог пребива во нас“ (1 Ив 4,11-12). За нас овој програм на верскиот живот навистина е доста тежок. Поедноставно кажано тоа значи дека не можеме да го љубиме Бога ако не го љубиме ближниот. Дури и тоа дека не можеме да го препознаеме Бога ако во ближниот не го познаваме и препознаваме својот брат. Затоа е важно да согледаме дека Иван ни покажува како е тоа сепак можно. Тој вели според оваа знаеме дека ние пребиваме во Него и Тој во нас: знаеме по тоа што ни дал од Својот Дух. Ако веруваме дека е Светиот Дух – Дух на љубовта на Отецот и Синот, тогаш Бог не дека нешто ни дал туку ни се даде самиот себе. Нема два Света Духа само е еден кој е Дух на Отецот и Синот и ако од тој Дух ни дал тогаш ни се дал себе да тоа што не можеме ние слабите по себе можеме да го оствариме по Него. Можеме да ги љубиме браќата со силата на Светиот Дух„.   

„Така дојдовме до третата порака на денешниот празник, а тоа е посланието на Црквата. Црквата е заедница и заедница која ја собира Светиот Дух. Апостолот вели: И ние видовме и сведочиме. Што? Сведочиме дека Бог е љубов  дека за спасение на човекот го испрати својот Син и дека темел на нашата вера е прифаќање и исповедување дека Исус е Божји Син. Црквата е повикана и затоа постои да таа вистина ја навестува до свршетокот на светот и до крајот на времето.  На таа доверба, на тоа искуство дека Бог е љубов се темели нашата сила на сведоштвото, бидејќи Црквата не е само навестителка туку и сведок. Омилена тема на папата Фрањо е зборот сведок – сведочење. Божјата љубов не се навестува туку се сведочи. Од таа сила на сведочење папа Фрањо го извлекува другиот темелен поим на христијаните во наше време а тоа е сигурност и радост на спасените. Христијанството не може да биде намрштено, тажно, христијанството е радосно бидејќи е во заедништво со Бога„.    „Драги браќа и сестри, треба искрено и понизно да признаеме: убаво е оваа што сега го размислувавме но кој може така да живее. Затоа да се загледаме во Исус. Тој денес ни вели: „Дојдете кај мене сите изморени и  обременети и Јас ќе ве успокојам, поучите се од Мене бидејќи сум кроток и смирен по срце“ (Мт 11,28-29). И ние сме денес пред Исус токму такви уморени и обременети и сакаме својата душа да ја окрепиме на Неговото смирено срце и да сфатиме дека Неговиот јарам не е тежок и Неговото време не е невозможно ни за мене како единка ниту за Црквата како заедница ако знаеме да му служиме на човекот во понизност и љубов. Во завршната молитва на денешната Богослужба токму тоа ќе молиме да знаеме да ги љубиме ближните и на тој начин да ја навестуваме Божјата љубов. Амин„.

Радосен и длабок момент на заедништво живееа преку 150 учесници на видео конференцијата во петокот, 8.05.2020 во вечерните часови, во знак на одбележување на една година од посетата на Папата на Македонија. Тоа беше средба на пастирите со своите верници. Модераторот дон Давор Топиќ потсети на „убавата сличност со празникот на Мајка Посредователка и вечерашната Zoom конференција. Нека Бог како Црква ни даде сила да можеме да бидеме и правиме пророчки знаци.“

На конференцијата се вклучија свештениците од сите парохии, монашки заедници и семејства од цела Македонија. Учесниците на самиот почеток ги поздрави локалниот бискуп монс. Киро Стојанов, истакнувајќи радост за посетата на Папата, и милосните моменти кои ги живееше Црквата. Потоа се разменија впечатоци од минатогодишната средба со папата Франциск во различни моменти на тој историски настан, сведочења од животот во време на пандемија, не недостасуваше и радосна песна која ја испејаа семејствата од своите домови. Се потврдува и доживува како актуелната ситуација предизвикана од пандемијата ни помага да откриеме нов начин и стварност на домашната Црква.

„Ова е време во кое Бог дава големи милости за Црквата.“, нагласи во своето обраќање монс. Антун Циримотиќ. „И вечерва доживеавме едно семејство во Господа, како стварност на она што папа Франциск го потцрта во својата посета, дека треба да бидеме мост помеѓу Исток и Запад. Не треба да се плашиме да го трошиме својот живот во љубовта, нека Мајка Тереза ни биде пример“, ги охрабри бискупот сите присутни. Средбата беше заклучена со заедничка молитва и благослов од бискупот.

На 7 мај 2020, денот кога ја одбележуваме првата годишнина од Апостолската посета на папата Франциск на нашата земја, ја отвораме официјалната веб – страница на Католичката катедрална парохија „Пресвето Срце Исусово“ во Скопје.

www.srceisusovo.mk е местото каде ќе ги објавуваме најновите информации од нашата парохија, но и место каде ќе можете да ги добиете основните информации за структурата на нашата парохија, за заедниците и групите кои делуваат во неа. Сето тоа збогатено со многу фотографии и видеа од настаните кои се случиле и ќе се случуваат во нашата катедрала. 

Покрај нашата Фејсбук страница и You tube канал, ова е уште еден начин да бидеме поблиску до вас драги верници. 

Во оваа прилика сакам да ја изразам мојата благодарност до брачниот пар Ена и Филип Чаусидис, како и на дон Фабијан Штедул за нивниот волонтерски придонес во изработка на оваа веб-страница.

Како што посетата на папата Франциск на нашата земја беше прекрасен дар од небото, така и оваа страница, која симболично ја отвораме токму на денешниот ден, нека биде подарок од небото за сите вас драги верници.

Со Божји благослов, вашиот поарох дон Давор Топиќ

По повод првата годишнина од посетата на папата Франциск на нашата земја, денес на 7 мај 2020 беше одржана онлајн конференција со цел да се оживеат историските моменти од оваа знајачна посета. Учесници беа домаќинот монс. д-р Киро Стојанов, Апостолскиот нунциј за Република Македонија, монс. Анселмо Гвидо Пекорари, кардинал Винко Пуљиќ, поранешниот претседател на Македонија г-дин Ѓорге Иванов, архиепископот Охридски и Македонски г.г. Стефан, г-дин Бујар Османи, вицепремиер задолжен за европски прашања г-дин Виктор Димовски, поранешен Државен секретар во МНР, г-дин Даријан Сотировски, директор на Комисијата за односи со верските заедници и други видни личности од земјата и регионот, а ќе бидат воспоставени линкови со Скопје, Сараево, Софија, Белград, Загреб и други градови од земјата и од регионот.

Конференцџијата беше пренесувана преку you tube каналот на Радио Марија Македонија.

Во вторник, 24 декември 2019 година свечената полноќна света Миса, во катедралата Пресвето Срце Исусово во Скопје ја предовдеше Скопскиот бискуп и Струмичко скопски епарх монс. др. Киро Стојанов во концелебрација со свештеници од скопска бискупија и струмичко скопска епархија.

Катедралата беше полна со мноштво верници, а на свеченоста присуствуваше и претседателот на Република Македонија Стево Пендаровски со сопругата Елизабета, како и заменик претседателот на Владата задолжен за европски прашања Бујар Османи, министер за внатрешни работи Оливер Спасовски, директор на Комисија за верски заедници Дарјан Сотировски, деканот на Православниот богословски факултет Ѓоко Ѓорѓевски, претставници на културниот и академскиот живот како и претставници на дипломатскиот кор.

Бискупот Стојанов во својата пригодна проповед рече: „Бог дојде во светот како дете. Оној кој е толку моќен, кој ги создаде небесата и земјата, кој на сите што живеат им вдахна свој дух на живот, се понижува и прифаќа да биде човек, да биде роден, прифатен, хранет, негуван. Така се манифестирала Божјата љубов во светот. И ние така треба да застанеме пред Бога, токму како деца. Кога знаеме дека сме од Бога сакани, тогаш треба да му возвратиме љубов на начин што ќе ги сакаме сите луѓе, без оглед какви сѐ и со какво име се нарекуваат. Бог, како дете, дојде на светот и се предаде целосно на луѓето да го хранат, негуваат, гледаат и воспитуваат. Божјата доверба кон човекот била голема. Тој и од нас очекува и нè повикува да му служиме токму во оние чии зборови едвај се слушаат во јавноста, кај малите и сиромашните или, со еден збор, кај оние во потреба“.

„Божјиот глас го слушна и папата Фрањо, кога на почетокот на мај одлучи да посети две балкански држави: Бугарија и Македонија, како гласник на мирот и љубовта. Овде кај нас, оваа посета беше во знакот на нашата Светица, света Мајка Тереза, чии напори ги пофали Светиот Отец, а преку тогашниот наш претседател Иванов, а во присуство на сегашниот Претседател Пендаровски, преставници на Владата и дипломатскиот кор, ни порача: „Ве охрабрувам: со самодоверба да истраете на патот што сте го зацртале, вашата Земја да ја направите светилник на мирот, прифаќање и плодна интеграција помеѓу културите, верите и народите!“ Мислам дека вечерва, како бискуп на оваа Црква, не можам да искажам поубава честитка од оваа“.

„Таму во јаслите лежи дете. Тоа не е обично дете, туку самиот Син Божји. Ова дете има чудна моќ, моќ што нè привлекува кон себе, велејќи ни: „Дојдете кај мене! Дозволете ми да го допрам вашето срце, тогаш ќе откриете дека сум ви брат, а и вие меѓу себе дека сте браќа и сестри“.

„Ова Дете кога ќе порасне повторно ќе ги обединува луѓето. Ќе им го одзеде стравот да не се плашат едни од други. Тој им дарува помирување, мир и заедништво. Така Исус собира околу себе голем круг на браќа и сестри од кои е создадена Црквата. За нив на почетокот се зборувало: Гледајте колку се сакаат. Зарем денес треба поинаку да се говори за нас? Не дај Боже“.

„Браќа и сестри, Исус да ни помогне да ја најдеме довербата што не прави човечни, да се учиме од Него на богољубност и човекољубност. Тој да ни помогне да ја најдеме таа блискост во нашите семејства, меѓу познатите и колегите, меѓу пријателите и соседите, во заедницата и во општеството, не само за овие празници, туку во текот на целата година и целиот наш живот. Во оваа радосно време да ги утеши тажните, да ги оздрави болните, да ги врати прогонетите на нивните огништа, а на сите нас да ни донесе радост и мир. Честит празник Рождество Христово! Христос се роди“.

На 15 декември 2019 година во дворот на скопската катедрал во организација на Македонски Каритас и Катедралната парохијата „Пресвето Срце Исусово“ – Скопје, а во соработка со Италијанската и Унгарската амбасада е организиран Божиќен саем. Покрај присуството на бискупот Стојанов, саемот беше посетен и од многу верници, граѓани, претставници на амбасади, како и од првата дама на Македонија г-ѓа Елизабета Ѓоргиевска.

Саемот понуди различни традиционални божиќни јадења и колачи, топли напитоци, украси и пригодни божиќни поклони.

Организирањето на Божиќниот саем имаше за цел собирање на средства, за сиромашни семејства, кои се корисници на помошта на Македонски Каритас.

Божиќниот саем во Скопје, традиционално се организира секоја година на третата недела од Божиќниот пост.